Црвениот крст на Република Македонија во соработка со Центарот за управување со кризи, Дирекцијата за заштита и спасување и соодветните институции од општина Струмица, во училиштето Димитар Влахов од Струмица организираше показно-тактичка вежба за евакуација и спасување во случај на земјотрес.

Главна цел на вежбата беше да се провери функционалноста на планот за евакуација и спасување на повредени и загрозени лица од објектот на училиштето Димитар Влахов, како и увежбување на координацијата помеѓу институциите од системот за управување со кризи и заштита и спасување во услови на природни катастрофи. Јакнењето на капацитетите и довербата во институциите на системот е од голема важност за намалување на последиците врз ранливите групи во општеството, меѓу кои спаѓаат и децата. Намалувањето на ранливоста најчесто зависи од знаењето и вештините на институциите на локално ниво.

Вежбата беше организирана по повод Меѓународниот ден за намалување на природните катастрофи, во рамките на локалната компонента на проектот Зајакнување на капацитетите на Центарот за управување со кризи. Проектот се спроведува од страна на Центарот за управување со кризи и УНДП со финансиска поддршка на Владата на Јапонија и Програмата за развој на Обединетите нации – Биро за заштита од кризи и закрепнување.

Целта на спроведувањето на вежбата беше проверка на функционалноста на планот за заштита и спасување во СОУ “Димитар Влахов” Струмица во делот евакуација и спасување на повредени и загрозени лица во објектот на училиштето, увежбување на вработените и учениците за правилна постапка во услови на загрозеност и употребата на професионалните институции на државата и локалната самоуправа за итни интервенции во објекти со приоритет во случај на несреки и катастрофи од поголеми размери.